2021 թ. օգոստոսին թեմակալ առաջնորդի օրհնությամբ մեկնարկեցին Լանջանիստ համայնքի մոտակայքում գտնվող Սբ Աստվածածին Սպիտակավոր (Ախքիլիսա) եկեղեցու (ԺԴ դար) պեղումների աշխատանքները՝ նպատակ ունենալով հնամենի սրբավայրի վերակառուցումը:

Պեղումներն իրականացվեցին հնագետներ Լևոն Մկրտչյանի և Արտակ Գնունու կողմից: Հնագետներին կամավորաբար միացան նաև թեմի հոգևոր հայրերը, ինչպես նաև համայնքի անդամները: 

Աշնանն իրականացվեցին նաև դեպի Սպիտակավոր տանող ճանապարհի բացման ու բարեկարգման աշխատանքներ:

2024 թ. ամռանը վերսկսվել են պեղումների աշխատանքները, որոնք իրականացնում է Հնագիտության և ազգագրության ինստիտուտի արշավախումբը՝ հնագետներ Դիանա Միրիջանյանի եւ Տիգրան Ալեքսանյանի ղեկավարությամբ։ Վանական համալիրի ամրակայման և վերականգնման նպատակով առավել մեծածավալ պեղումների անհրաժեշտություն կա: Այս անգամ ևս պեղումներին մասնակցում են թեմի թե՛ հոգևորականները, ներառյալ թեմակալ առաջնորդ Գևորգ եպս Սարոյանը, թե՛ այլ հոգևորականներ և հավատացյալներ։

Սպիտակ վանքի համալիրը բաղկացած է Սբ Աստվածածին եկեղեցուց և կից օժանդակ կառույցներից, որոնց գործառական նշանակությունը պարզ կդառնա պեղումների ավարտին:

Տարվող աշխատանքներին կարող եք ծանոթանալ  բաժանորդագրվելով թեմի տելեգրամյան ալիքներին՝

🇦🇲 https://t.me/spitakvank

🇷🇺 https://t.me/whitemonastery

Սպիտակ վանքի պեղումների մասին առավել մանրամասն կարդացեք հետևյալ հոդվածներում և դիտեք ներքևում տրված տեսանյութերը։

◊ Մեր պատմության մի էջ ևս

◊ Մոնղոլական դրամ, խեցեղեն ու տապանաքարեր՝ պեղվում է Լանջանիստ գյուղի Սպիտակ Վանք համալիրը, որը մտադիր են վերականգնել

◊ Հնագիտական պեղումների բացառիկ արդյունքը. Սպիտակ Վանքի տարածքում հողով ծածկված եւս մեկ եկեղեցի է հայտնաբերվել

◊  14-րդ դարին բնորոշ ջնարակած խեցեղեն, դամբարան եւ թոնիր. Սպիտակ Վանք համալիրում պեղումները շարունակվում են

Մասյացոտնի թեմի առաջնորդ Տ. Գևորգ եպս Սարոյանի նախաձեռնությամբ 2021 թ. ամռանը մեկնարկեցին Մրգանուշ համայնքի Սուրբ Աստվածածին խոնարհված եկեղեցու պեղումների աշխատանքները, որոնք իրականացվում են հնագետներ Լևոն Մկրտչյանի («Պատմական միջավայրի և արգելոց թանգարանների պահպանության ծառայություն» ՊՈԱԿ-ի հուշարձանների պահպանության բաժնի գլխավոր մասնագետ) և Արտակ Գնունու (ԵՊՀ հնագիտության և ազգագրության ամբիոնի դոցենտ) կողմից։ Պեղումների արդյունքում գտնվեցին եկեղեցու չորս սյուներից երեքը, ինչպես նաև խեցեղենի մնացորդներ: Առանձնակի ուշադրության է արժանի հատկապես եկեղեցու քարե արձանագրության հայտնաբերումը, ըստ որի՝ եկեղեցին կոչվել է սուրբ Թադեոս առաքյալի անունով: