Մասյացոտնի թեմի Սբ Հովհաննես Ավետարանիչ  առաջնորդանիստ եկեղեցին կառուցվել է 2015 թվականին: Մինչ այդ Արտաշատ քաղաքի բնակիչների համար  աղոթատեղի են ծառայել քաղաքի մի քանի մատուռները: Այդ մատուռներից ամենահայտնին եկեղեցուց ոչ հեռու՝ լճի մոտակայքում գտնվող Թուխ Մանուկն է, որի դռները չեն փակվել անգամ խորհրդային աստվածմերժության տարիներին: Սուրբ Պատարագի, սուրբ Մկրտության ու սուրբ Պսակի արարողություններին մասնակցելու համար քաղաքի բնակիչներն այցելել են հիմնականում Մրգավան գյուղի Սուրբ Հակոբ եկեղեցի կամ Խոր Վիրապի վանք: 

Սուրբ Հովհաննես Ավետարանիչ եկեղեցու հիմնօրհնեքը կատարվել է 2002 թ.: Եկեղեցու տարածքը եղել է ճահճային, ինչի պատճառով եկեղեցու կառուցումը երկար է տևել: 

Եկեղեցին կառուցվել է Հովիկ Աբրահամյանի և Աբրահամյան ընտանիքի հովանավորությամբ: Եկեղեցու օծումը կատարվել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի ձեռամբ 2015 թվականի մայիսի 31-ին:  Ճարտարապետներն են Արտակ Ղուլյանը և Էմմա Ֆահրադյանը: 

Իր կառուցվածքով Սուրբ Հովհաննես Ավետարանիչ եկեղեցին նման է յոթերորդ դարի հայկական սրբավայրերին: Խաչաձև հիմքով կենտրոնագմբեթ տաճարի գմբեթը, զանգակատունը, գլխավոր, հյուսիսային և հարավային մուտքերն ու ելքերը հարուստ են զարդաքանդակներով: Եկեղեցին հարուստ է նաև սրբապատկերներով, որոնք հիմնականում Հովնաթանյանների ստեղծագործությունների կրնօրինակներն են: 

Եկեղեցու աջ և ձախ կողմերում տեղադրվել են երեք խաչքարեր՝ նվիրված Հայոց ցեղասպանության զոհերի, Ապրիլյան քառօրյա և Արցախյան 44-օրյա պատերազմների նահատակ հերոսների հիշատակին: 

Եկեղեցական համայնքի վարչական շրջանը  Արտաշատ քաղաքն է։

Եկեղեցական համայնքում գործում են տիկնանց և երիտասարդաց  միություններ, «Շողակաթ» կիրակնօրյա դպրոցը։ Ամռան ընթացքում կազմակերպվում է բակային հոգևոր ճամբար: Շաբաթվա մեջ մեկ օր եկեղեցում կատարվում է Աստվածաշնչի սերտողություն։

Եկեղեցում ամեն կիրակի և տոն օրերին մատուցվում է սբ Պատարագ,   ամեն օր կատարվում են առավոտյան, ճաշու, երեկոյան ժամերգություններ։

Սուրբ Ավետարանիչների տոնը սահմանված է որպես եկեղեցու ուխտի օր:

Սուրբ Հովհաննես Ավետարանիչ առաջնորդանիստ եկեղեցու հոգևոր հովիվն է Տ. Երվանդ քհն. Բաբայանը, իսկ լուսարարապետը՝ Տ. Հովսեփ քհն. Սարգսյանը։

Եկեղեցու ֆեյսբուքյան էջը՝    https://www.facebook.com/StHovhannes/